Enzo Gragnaniello fan site

Testi

Posteggiatore abusivo (1995)

SCETATE

Si duorme o si nun duorme bella mia
Siente pe’ nu mumento chesta voce
Chi te vò bene assaje sta ’mmiez’a via
Pe’ te cantà na canzuncella doce
Ma staje durmenno, nun te si scetata
Sti ffenestelle nun se vonno aprì
È nu ricamo ’sta mandulinata
Scétate bella mia, nun cchiù durmì
È nu ricamo ’sta mandulinata
Scétate bella mia, nun cchiù durmì
’Ncielo se so’ arrucchiate ciento stelle
Tutte pe’ stá a sentí chesta canzone
Aggio ’ntiso ’e parlà li ttre cchiù belle
Dicevano: nce tène passione
È passione ca nun passa maje
Passa lu munno, essa nun passarrà
Tu, certo, a chesto nun ce penzarraje
Ma tu nasciste pe’ mm’affatturà
Tu, certo, a chesto nun ce penzarraje
Ma tu nasciste pe’ mm’affatturà

© Russo - Costa

VIERNO

È vierno: chiove, chiove ’a na semmana…
e st’acqua assaje cchiù triste mme mantene…
Che friddo, quanno è ’a sera, ca mme vène…
cu st’aria ’e neve, mo ca manche tu.
’Sta freva, ca manch’essa mm’abbandona,
’sta freva, ’a cuollo, nun se leva cchiù!
Vierno!
che friddo ’int’a stu core…
e sola tu,
ca lle puó dá calore,
te staje luntana e nun te faje vedé!
Te staje luntana e nun te cure ’e me!
Ca mamma appiccia ’o ffuoco tutte ssere
dint’a ’sta cammarella fredda e amara?!
“Ma che ll’appicce a fá, vecchia mia cara,
s’io nun mme scarfo manco ’mbracci’a te!?”
Povera vecchia mia…mme fa paura:
è n’ombra ca se move attuorno a me!…
Vierno!
che friddo ’int’a stu core…
e sola tu,
ca lle puó dá calore,
te staje luntana e nun te faje vedé!
Te staje luntana e nun te cure ’e me!

© Acampora - De Gregorio

SCIUMMO

Tu scinne
Sciummo, sciummo, sciummo
D’ ’a muntagna
Io scenno
Ca ’na malasciorta
M’accumpagna
E ghiammo, ohè
Ll’ammore è sciummo ca se perde a mare
Tu cante tocche, tocche, tocche
Spaccalegna
A saccio nun ce sta ’na vocca cchiù sanguegna
E i’ scenno, ohè
Chi perde ’ammore va cercanno ’o mare
Campana
Ca suone ’a copp’a ’stu cunvento
Tu siente
Ch’ha fatto chella faccia ’e santa?
Ajere, ’mbracci’a me, ’nu svenimento
Stasera vasa a ’n’ato e se n’avanta
Oje comme
Sona lenta e triste
’Na zampogna
Ca scenne
Sciummo, sciummo, sciummo
D’ ’a muntagna
E ghiammo, ohè
Ll’ammore è sciummo ca se perde a mare
E ’nfunn’ o mare s’arreposa ’o core
E ghiammo, ohè
Chi perde ’ammore va cercanno ’o mare
Paese
Addò sò nato, i’ te saluto
Te veco
Llà ’ncimma, sulo e abbandunato
E io ’nfamo, ’nfamo ’e me
Mme ne sò ghiuto
Te lasso pecché ’ammore m’ha lassato
Tu chiagne
Quase comm’a ’n’ommo
Ca se lagna
E i’ scenno
Sciummo, sciummo, sciummo
D’ ’a muntagna
E ghiammo, ohè

© Concina - Lucillo

CATARÌ

Marzo: nu poco chiove
e n’atu ppoco stracqua…
Torna a chiovere, schiove…
ride ’o sole cu ll’acqua

Mo nu cielo celeste,
mo n’aria cupa e nera…
Mo, do vierno, ’e ttempeste,
mo, n’aria ’e primmavera…

N’auciello freddigliuso,
aspetta ch’esce ’o sole…
’Ncoppo tturreno ’nfuso,
suspirano ’e vviole…

Catarí, che vuó cchiù?
’Ntiénneme core mio:
Marzo, tu ’o ssaje, si’ tu…
e st’auciello, songh’io…

Ll’ammore è sciummo ca se perde a mare
E ’nfunn’ o mare s’arreposa ’o core

© Di Giacomo - Costa

SCALINATELLA

Scalinatèlla,
longa longa
longa longa
Strettulélla
strettulélla,
addó’ sta chella
’nnammuratèlla?
Nun spónta ancora...
zuc zuc zuc zuc
zucculillo
zucculillo,
pe’ ’sta viarèlla
scarrupatèlla!

Addó mme ne vogl’í, t’ ’o ddico...e crídeme...
addó’ se ne pò ghí chi è stanco ’e chiágnere?!

Scalinatèlla
saglie ’ncielo
o scinne a mare
cercammélla
trovammélla, pòrtame a chella
sciaguratèlla!

Chella s’è ’nnammurata ’e nu pittore
ca pitta Capre e parla furastiero...
e i’ porto ’mpiétto nu dulore ’e core
e sento che mm’accide stu penziero!

Scalinatèlla
longa longa

A ghiuorne a ghiuorne parte nu vapore...
A ghiuorne ’ammore mio se vótta a mare!

© Cioffi - Bonagura

CORE ’NGRATO

Catarì, Catarì,
Pecchè me dici sti parole amare,
Pecchè me parle e ’o core
Me turmiento Catari?
Num te scurdà ca t’aggio date ’o core, Catari
Nun te scurdà!
Catarì, Catarì, che vene a dicere
Stu parlà, che me dà spaseme?
Tu nun ’nce pienze a stu dulore mio
Tu num ’nce pienze tu nun te ne cura
Core, core ’ngrato
T’aie pigliato ’a vita mia
Tutt’ è passato
E nun’nce pienze cchiù!
Catarì, Catarì,
Tu nun ’o saie ca’nfin’int’ a na chiesa
Io so’ trasuto e aggio priato a Dio, Catari
E l’aggio ditto pure a ’o cunfessore
I’ sto a fuffrì
Pe’ chella llà!
Sto a suffrì,
Sto a suffrì, nun se po’ credere,
Sto a suffrì tutte li strazie!
E ’o cunfessore ch’è persona santa,
M’ha ditto: Figlio mio, lassala sta’, lassala sta’
Core, core ’ngrato
T’ aie pigliato ’a vita mia
Tutt’ è passato
E nun’nce pienze cchiù!

© Cardillo - Cor di ferro

GIURAMENTO

Mare!
’Nu vapore s’ ’a purtaje
Chella sera ca giuraje:
“Io torno, aspettame! Nun te scurdà!”
Mare!
Ogne sera ca te veco
D’ ’e pparole sento ll’eco:
“Io torno, aspettame! Nun te scurdà!”
Ma ’e mise passano, c’aspetto a ffà?

Comme te può scurdà
Ca t’aggio amata?
Comme se pò sbaglià
Pe’ tutt’ ’a vita?
E si nun vuò penzà
’E giuramente ca facive a mme,
Comme te può scurdà
Ca t’aggio amata,
Si aggio perduto ’a vita mia pe’ tte?

Mare!
Dint’ ê llettere ’e cchiù ardente
Me ripete ’e giuramente:
“Io torno, aspettame! Nun te scurdà!”
Mare!
Si tu saje ca nun è overo
Levammella d’ ’o pensiero,
“Io torno, aspettame! Nun te scurdà!”
O ’a strada ’mparala p’ ’a fà turnà!

Comme te può scurdà
Ca t’aggio amata?
Comme se pò sbaglià
Pe’ tutt’ ’a vita?
E si nun vuò penzà
’E giuramente ca facive a mme,
Comme te può scurdà
Ca t’aggio amata,
Si aggio perduto ’a vita mia pe’ tte?

Mare!
’Nu vapore s’ ’a purtaje
Luntano ’a me!

© Vian - Russo

TU CA’ NUN CHIAGNE

Comm’è bella ’a muntagna stanotte
bella accussì, nun ll’aggio vista maje
N’ànema pare, rassignata e stanca
sott’ ’a cuperta ’e chesta luna janca

Tu ca nun chiagne e chiàgnere mme faje
tu, stanotte, addó staje?
Voglio a te
Voglio a te
Chist’uocchie te vonno
n’ata vota, vedé

Comm’è calma ’a muntagna stanotte
cchiù calma ’e mo, nun ll’aggio vista maje
E tutto dorme, tutto dorme o more
e i’ sulo veglio, pecché veglia ammore

Tu ca nun chiagne e chiágnere mme faje
tu, stanotte, addó staje?
Voglio a te
Voglio a te
Chist’uocchie te vonno
n’ata vota, vedé

CHIOVE

Tu staje malata e cante,
Tu staje murenno e cante...
Só’ nove juorne, nove,
Ca chiove... chiove... chiove...
E se fa fredda ll’aria,
E se fa cupo ’o cielo,
E tu, dint’a stu ggelo,
Tu sola, cante e muore...
Chi si’? Tu si’ ’a canaria...
Chi si’? Tu si’ ll’Ammore...
Tu si’ ll’Ammore,
Ca pure quanno more,
Canta canzone nove...
Giesù, ma comme chiove!
Tu, comm’a na Madonna,
Cante na ninna-nonna
Pe’ n’angiulillo ’ncroce,
Ca vò’ sentí ’sta voce,
’Sta voce sulitaria
Ca, dint"a notte, canta...
E tu, comm’a na Santa,
Tu sola sola, muore...
Chi si’? Tu si’ ’a canaria!
Chi si’? Tu si’ ll’Ammore...
Tu si’ ll’Ammore,
Ca, pure quanno more,
Canta canzone nove!...
Giesù, ma comme chiove!

CANZONE APPASSIUNATA

N’albero piccerillo aggiu piantato,
Criscènnolo cu pena e cu sudore
Na ventecata giá mme ll’ha spezzato
E tutt"e ffronne cágnano culore
Cadute só giá ’e frutte: e tutte quante,
Erano doce, e se só fatte amare
Ma ’o core dice: “Oje giuvinotto amante,
’E ccose amare, tiénele cchiù care”
E amara comme si’, te voglio bene!
Te voglio bene e tu mme faje murí
Era comm"o canario ’nnammurato,
Stu core che cantaje matina e sera
“Scétate!” - io dico - e nun vò stá scetato
E mo, nun canta manco a primmavera!
Chi voglio bene nun mme fa felice:
Forse sta ’ncielo destinato e scritto.
Ma i’ penzo ca nu ditto antico dice:
“Nun se cummanna a ’o core”. E i’ mme stó zitto!
E mme stó zitto, sí... te voglio bene
Te voglio bene e tu mme faje murí

© E. A. Mario

VOCE ’E NOTTE

Si ’sta voce te scéta ’int’ ’a nuttata,
mentre t’astrigne ’o sposo tujo vicino,
statte scetata, si vuó stà scetata,
ma fa’ vedé ca duorme a suonno chino.

Nun ghì vicino ê llastre pe’ffà ’a spia,
pecché nun puó sbaglià, ’sta voce è ’a mia.
E’ ’a stessa voce ’e quanno tutt’e duje,
scurnuse, nce parlávamo cu ’o “vvuje”.

Si ’sta voce te canta dint’ ’o core
chello ca nun te cerco e nun te dico,
tutt’ ’o turmiento ’e nu luntano ammore,
tutto ll’ammore ’e nu turmiento antico.

Si te vène na smania ’e vulé bene,
na smania ’e vase córrere p’ ’e vvéne,
nu fuoco che t’abbrucia comm’a che,
vàsate a chillo, che te ’mporta ’e me?

Si ’sta voce, che chiagne ’int’ ’a nuttata,
te sceta ’o sposo, nun avé paura.
Vide ch’è senza nomme ’a serenata,
dille ca dorme e che se rassicura.

Dille accussì: “Chi canta ’int’a ’sta via
o sarrà pazzo o more ’e gelusia.
Starrà chiagnenno quacche ’nfamità.
Canta isso sulo, ma che canta a fà?”

SILENZIO CANTATORE

Zitta,
Stanotte, nun dicere niente,
Cademe ’mbraccia, ma senza parlà...
Dòrmeno ’e ccose nu suonno lucente...
Nu suonno ’e ’na notte d’està
Marì
Dint’o silenzio
Silenzio cantatore
Nun te dico parole d’ammore,
Ma t’e’ ddice ’stu mare pe’ me!...
Dimme:
Stanotte si’ tutta d’ ’a mia?
Ll’uocchie tuoie belle me diceno ’e sì...
No, cu ’sta luna, nisciuna buscìa
’Sta vocca busciarda po’ di!...
Marì
Dint’ ’o silenzio,
Silenzio cantatore
Nun te dico parole d’ammore
Ma t’e’ ddice ’stu cielo pe’ me!...
Marì
Dint’ ’o silenzio,
Silenzio cantatore
Nun te dico parole d’ammore
Ma t’e’ ddice ’o silenzio pe’ me!...